Со благослов на Неговото Блаженство Архиепископот охридски и Митрополит скопски г.г. Јован, во Ставропигијалниот манастир „Свети Јован Златоуст“, Нижеполе, Битола, на денот кога се празнува големиот отец и учител, светиот Јован Златоуст, со црковно благолепие беше отслужено сеноќно бдение по повод манастирската слава, а воедно и по повод именденот на Неговото Блаженство. На бдението началстуваше Неговото Преосвештенство Епископот полошко-кумановски и Местобљустител дебарско-кичевски г. Јоаким, во сослужение на повеќе свештенослужители од Архиепископијата.
По прочитаното Евангелие, Епископот г. Јоаким беседеше пред собраниот верен народ, при што ја искажа неговата благодарност до Архиепископот охридски г.г. Јован, за поканата и благословот да чиноначалствува на Литургијата, на денот кога се празнува манастирската слава. Истовремено, честитајќи му го именденот на Архиепископот охридски г.г. Јован, Епископот г. Јоаким се осврна на тешките затворски услови во кој се наоѓа Неговото Блаженство, како и на континуираниот прогон што се врши врз него.
Епископот г. Јоаким ја изрази својата надеж во Бога како извор на поткрепа во крстот и страдањата коишто Архиепископот охридски г.г. Јован ги претрпува од расколниците, само заради остварувањето на единството со Соборната Црква, изразувајќи верба за што поскоро завршување на државниот прогон врз Православната Охридска Архиепископија.
По бдението, сестринството на манастирот имаше подготвено послужување за сите верни.
Извор: Архиепископија охридска
